ايام فى الغربة

ايام فى الغربة
مطول ولى زمن غايب
افتش فى دريب رجعة
اعود بالخاطر الطايب
واسيب الغربة بالفيها
لامغلوب ولاغالب
وليه ياقلبى تتعزب
وليه بس ليه تعيش عازب
وليه من غربة لى غربة
وليه فى الفاضى بتحارب
وداخل فى متاهاتا
وبين مضروب وبين ضارب
حكايتك باقى يالمسكين
حكاية الموجة والغارب
----------
عيون السمحة منتظراك
وتحلم بيك تعود ايب
تزيل وجع البعاد المر
وتمسح دمعها الساكب
وانت على البعد مصلوب
وفوق جمر القوى اللاهب
تقاسى الفرقة ياحليلك
لامصحوب ولا صاحب
----------
بجيك يعيون بتوحشنى
وياما قليبى بيك دايب
بجيك بى عاطفة تجمح بي
وبى قلبا كتير راغب
بجيك بى لهفة الملهوف
لو خسران ولو كاسب
بجيك بالسيرة والتمتم
وباللحن الشجى الصاخب
يغنى الليل يهز يعرض
يتكى فينا متسائب
وحجم الفرحة والاحلام
معاى ومعاكى متقارب
همسك وهمسى وانفاسنا
حنين ايقاعا متقارب
اشيلك شوق واختك شوق
بين الرمش والحاجب
طراوة عطرك المخمور
يفوح من جسمك الشارب
لم ادور اداعب القمرة
الاقى القمرة بداعب
امد ايدى على الخصلة
تقول لى بى بشيش حاسب
احس بى انى فى احلام
وفوق هام السحاب ساحب
اقول للغربة ياغربة
هو سفرا فيكى شن جايب
مراكبى لقت مراسيها
وتوبة التوبة للتايب


بالفعل قصيدة جميلة