من السحاره

موضوع: من السحاره الإثنين يناير 07, 2008 2:52 pm

صورة ،،،،،،
ورقه قديمه،،،،،
جواب،،،،،
اى حاجه....
تعالو نتشارك
.
.
.
تعالونتشارك من السحاره

مشرف عدد الرسائل : 77 تاريخ التسجيل : 30/12/2007

أكيد في كم عضو ما عارفين السحارة دي شنو عشان كده ترجم

السحاره من الادوات المنزليه المهمه فى البيت زمن حبوباتنا
وهى عباره عن صندوق مصنوع من الخشب المتين يتم الاستعانه
بالجلود فى صناعته وتزيينه....يتم فيه حفظ الاشياء النفيسه والغاليه
السحاره منتشره فى اغلب المجتمعات العربيه....
اصبح الناس يستعملوها فى زمننا هذا كقطعه ديكور لتزيين المنازل
كما تم تصغير حجمها واستعمالها كصندوق عرض للذهب والمجوهرات

شكراً ليك يا سهام الدين أخير قدرت أدخل الموقع .

أبدا يا سهام و نحن وراك

موضوع: رد: من السحاره السبت يناير 12, 2008 1:03 pm

بسم الله
نبدأ فتح السحاره

التواريخ على الوثيقه بتاريخ 1334هـ ، 1336هـ بما
يوازى بالميلادى 1912م ، 1914م
حيث كان المرشد الأول لطريقه الختميه السيد على الميرغنى بن السيد محمد عثمان فى عهده
شهدت طائفة الختميه تنظيما لشئون أمر المريدين ومن ضمن هذا التنظيم كان صك الخلافه.
يكون بموجبه الخليفه الشخص المسئول عن الاذكار الخاصه بالختميه من قراءة الراتب واجازة
القراءة له والاشراف على ادائه بالصورة المثلى والبدايه والختم من ثم الدعاء كما كان عليه
الاشراف على هبات المريدين من طين وزرع وضرع للساده المراغنه والاشراف عليها وتولى
امرها بالعنايه والاهتمام بها دون أجر تقربا لله فى شخص عباده الصالحين.
وبما ان معظم شمال السودان ينتمون الى طائفة الختميه فقد كان للخليفه مكانه ساميه واجازة
السيد على الميرغنى للخليفه لا تتم بحسب ونسب فقط بل بالعلم الذى ناله الخليفه المعين وقد
يوضح السيد اسباب اختياره للخليفه المعين لعلمه أو نسبه وقد لايوضح ذلك....
تدهورنظام الخلافه بعد ولوج السيد على الميرغنى عالم السياسه فى بواكير الحركه الوطنيه
بعد حركة1924
..
ومازال المجتمع السودانى ككل يضع مكانه للخليفه ولاسرته ولابنائه لتشربهم بادب الصوفيه
السمحه من خلال اداء الراتب والعدد وحفظ القران وتعليمه
انظر الوثيقتين كمثال
ملحوظه اشكر اخى ياسر خليفه على المقدمه اعلاه

موضوع: رد: من السحاره السبت يناير 12, 2008 5:04 pm

الأخ سهام لك التحايا فلك باع طويل في هذا المنتدى رقم قصر فترته وواضح انه سحارتك مليئة بالكثير نريد شرح لعلاقتك بهذه الوثائق التاريخية

وأحفر لينا من قعر السحارة حاجات تاني لك التحايا

موضوع: رد: من السحاره الأحد يناير 13, 2008 10:04 am

الاخت العزيزة اميرة
لك الشكر الجزيل
وبجيك صادى لعلاقتى بالوثائق
وان شاء الله سحارتنا دى حاتطلع حاجات كتيرة

موضوع: رد: من السحاره الأحد يناير 13, 2008 10:33 am

لتوضيح من ذكرت اسمائهم اعلاه
طبعا انا اسمى بالكامل سهام الدين الشريفى الشريفى مصطفى منصور
اى ان والدى مسمى على ابيه كعادة الاهل بسبب وفاة ابيه قبل ولادته
المذكور فى الوثيقه الثانيه هو مصطفى منصور جد والدى
عندما استخرج الوالد اوراقه للعمل بكسلا استخرجت الاوراق باسم
الشريف دون تكرار....
اما احمد مصطفى المذكور فى الوثيقه الثانيه او كما يقول ناس البلد
امحمد ود مصطفى فهو والد حبوبتى العطيه والدة والدى
واسمها العطيه احمد مصطفى
علما بان مصطفى ومنصور اخوان

موضوع: رد: من السحاره الأحد يناير 13, 2008 8:05 pm

ياسهام شكرا للسحاره القيمه والدي يقول بان المقصود با احمد المصطفي هو جدي الشريف وليس كما زكرت

موضوع: رد: من السحاره الإثنين يناير 14, 2008 1:56 pm

الاخ حاتم شكرا على المرور ....
وان كنت ارجح ماكتبت لانو الاسم واضح
مع تحياتى لعمى

موضوع: رد: من السحاره الإثنين يناير 14, 2008 2:03 pm

ابن خالى جلال الخليفه محمد ادريس شخص معروف بالنظام الشديد لدرجه ممكن تكون مزعجه لمن لايعرفه جيدا..... يمتاز جلال بخصله اخرى وهى الاحتفاظ بالاوراق والصور ....وقد وصل من الحج بالسلامه وكنا حضورا فى شندى لاستقباله هو والحاجه ستنا....وطبعا الحكايه كانت فيها خرفان وكده وصادفت اجازة التلاته يوم....
الراجل وصل تعبان ووسط الضيوف استطعت بعد مجهود الخروج منه ببعض الاوراق والصور...اردت ان اشارك بها فى السحاره...له شكرى وفى مره تانيه بنمرق منو حاجات اكتر...
اها المشاركه الجايه بنمرق كرت الشكر

كنت دائما اعجب بتفرد اهلنا بترتيب امور الضيافه والاستقبال فى مناسباتنا الاجتماعيه المختلفه سواء كانت فى الافراح او الاتراح.....
ومن اكثر المواقف التى تكون مهيبه فى نظرى فى مناسبات الوفيات عندما يكون الجميع فى انتظار وصول وفد للتعزيه...وعندها تسمع اها الجماعه وصلو وين ....وعند اقتراب وصول الوفد يقوم كل الموجودين بالوقوف بصورة منتظمه....وتتم اجراءات التعزيه بينهم بنظام وصورة مهيبه ....افقدها خلال مشاركتى فى بعض الاجتماعيات خارج الاسره ...وانت تتعب فى البحث عن من تقوم بتعزيته
الا انه ارى فى ايامنا هذه خاصه مع كثرة الناس وتشعب العلاقات الاجتماعيه ان ينتبه الجميع للغرباء الذين يحضرون للمشاركه....والاهتمام بهم ومعرفتهم والتعرف عليهم...
مادفعنى للكلام اعلاه الكرت المرفق قام بطباعته الخال الخليفه محمد ادريس وتم ارسال هذا الكرت بالبوسته لجميع من شارك بالحضور شخصيا او برقيا لشكره على مشاركته ومواساته فى فقيده الاسره الحاجه زهراء الشيخ محمد والده والدتى
وقد اعجبت بهذا الاهتمام لشكر الناس....واتمنى ان يعيننا الله جميعا لشكر الناس وصله الارحام
ونسال الرحمه والمغفره للخال الخليفه ووالدته الحاجه زهراء
تاريخ الكرت 1970م

المشاركه الجايه اسبير طاحونه ودالقاضى
وبينى وبينكم بنعمل تانى زى مصطفى والسحاره لو ماجايبه حقها بنقفلها

مشرفة عدد الرسائل : 67 تاريخ التسجيل : 10/12/2007

التحية لك الأخ سهام والله سحارتك خطيرة

وأقول ليك الوداك جلوجيا شنو المفروض تكون عالم آثار كان على الأقل طلعت لينا مملكة في الرباطاب والله الجلوجيا فيها حفر و تنقيب برضو عشان كدى بتعرف تنقب السحارات صح ؟؟؟؟؟؟؟
لك التحية والى مزيد من التنقيب في السحارات

مشرف عدد الرسائل : 216 تاريخ التسجيل : 14/11/2007

سهام الدين
متابعين
واصل

شكرا سهام الدين يارائع

وشكرا مرة اخرى نيابه عن الوالد الاخ جلال الدين

كما ذكر الاخ سهام اهتمامات الاخ جلال بحفظ وترتيب الاواق ولى معاها حكايه ......

لظروف الوالد (عليه رحمه الله ) العمليه تم نقله لابوحمد من عطبرة بعد ميلادى ولم تستخرج لى شهادة ميلاد وعند دخول المدرسه استخرجت لى شهادة تسنين ولم يتفق الجميع حول تاريخ ميلادى ومنذ ايام قلائل وانا ابحت فى اوراق اخى جلال (سحارته مجازا ) وجدت خطاب من الخاله كسبه الحاج تهنى بالمولود مزيل بتاريخ اعتمد التاريخ وذهبت للسجل المدنى بعطبرة ووجدت البيانات موجود واستخرجت شهادة ميلادى التى لم تستخرج بعد 38 عاما ....

ياسهام شوف لنا حل لياسر خليفه .....
اقترح اقفل سحارتك شويه .... خلى سحارة تانيه تنفتح (تشويق)

مشرف عدد الرسائل : 77 تاريخ التسجيل : 30/12/2007

يعني مواليد الف و تمنمية و كم يا باقر

موضوع: رد: من السحاره الخميس يناير 17, 2008 1:26 pm

الاعزاء
اميره
مصطفى
الباقر
زاهر
شكرا للمرور والتشجيع

وريقه صغيره جعلتنى ارجع بزاكرتى للوراء زى ماقال عصام الشريف ( زمن
الارديه ) والاجازه فى البلد...كانت من
اجمل اللحظات عندما يقومو بارسالنا الى المحطه ( دكاكين السوق) لانو الحكايه فيها
جيب مقاضى وركوب الحماره فى مشوار طويل نفوز فيهو بى قريشات لشراء الطحنيه....يدوك
ليها فى ظرف جواب نستلذ بسفها فى طريق العوده...لا يعكر صفوها الا العطش الشديد
الذى يصيبك قبل الوصول للحله....كانت اكبر مشكله عندما يكون المرسال فيهو دقيق عيش
فى الطاحونه....طاحونة جدنا ابراهيم القاضى له الرحمه...

لانو الواحد لازم يضمن انو عمنا الصادق يدقق ليهو العيش بدرى ...لتركه
فتره كافيه ليبرد..فالجلوس على كيس دقيق سخن امر لايطاق...وكثيرا ماكان عمنا
الصادق يسرع لنا فى طحن دقيقنا حتى ولو كانت هناك زحمه مستغلين اننا ضيوف فى
البلد...

نحن حضرنا طاحونه ود القاضى ...وعلمت لاحقا بان صاحبها الاصلى هو العم
الشريفى محمد طاهر واول من قام بادارتها اخوه العم حمدتو نسال الله لهم
الرحمه...وعندما تمت البيعه كما قال لى الخال حسن جلال الدين نقصت القروش فقامو
بارساله الى حبوبه نفيسه واعطته ربطتين من القروش بعد تدبيس جيبه خوفا من سقوط
القروش...وبدكان الخال جعفر قام بتسليمهم القروش قام الشريفى بوضعها فى الميزان
دون ان يكلف نفسه عناء عدها واسرع نحو المحطه ليلحق بالقطار

ابراهيم القاضى اى حاجه عندو مابتشبه العند الناس .. اى حاجه مجيهه
جيهه شديده...باب حوش لاتجد له مثيلا فى الكربه ..بير المويه...مخزنه به كل
الادوات للحفر وخلافه....

كثيرا ماكنا نشهد سقوط بعض اشجار النخيل...وفى احدى الاجازات نظرت
باعجاب شديد وارى النخيل قرب بيت حبوبتى نفيسه محمى بدبدب عالى من الطين...

خالى عبد الرحمن تاج الدين وهو يحكى لى خاصه عندما يكون الشاى سخن
قائلا: كان ود القاضى يشرب الشاى سخن وعند احضاره له وفى ايامه الاخيره يمسك
بالكبايه ويحاكيه فى رجفة اليد قائلا: ده شنو يانفيسه نار جهنم نار جهنم وهو يشفط
الشاى واضعا الكبايه فارغه وبوخها لاوى...

كانت الطاحونه تعمل بوابور ليس من نوعيه الوابورات المعروفه فى منطقة
الرباطاب وكانت اسبيراته تطلب من الشركة من الخرطوم...كل الكلام الفوق ده جابتو
الوريقه ادناه بتاريخ

11.5.1965 من الشركه بالخرطوم
عباره عن اخطار بارسال طلبيه اظن انها
اسبير باسم ابراهيم القاضى محطه الكربه

.

موضوع: رد: من السحاره الخميس يناير 17, 2008 6:31 pm

كتر خيرك ازرق ..... تمام

هذه الورقه ولها رفيقات وجدت فى مصحف كبير (مدخلنو فى كيس) يخص الوالدعليه رحمه الله حقيقه اجتهت بصحبة الاخوان سهام الدين وتاج الدين فى فك طلاسيمها وعجزنا ساعتها ... لك التقدير سهام الدين فى الاجتهاد والبحث

وعلى ذكر جدنا ابراهيم القاضى عليه رحمه الله والسحارة اذكر انى اول ماعرفت السحارة كانت مملوكه لحبوبه نفيسه عليها رحمه الله واظنها موجودة للان بالكربه

موضوع: رد: من السحاره الخميس يناير 17, 2008 8:26 pm

سحارتك رايعه .....

بها نفحات الاعزاء جدا ....

وكمان ورتنى حاجه كنت محتارة فيها

الحفظ والليم دا جبناة من وين.....

موضوع: رد: من السحاره الخميس يناير 17, 2008 10:41 pm

سلام سولارا
.
.
.
جدك اكتر زول اعرفه يحتفظ بالمستندات حتى خطاباته كان يحتفظ بصوره منها ....يكتبها بالكربون وتوجد العديد من خطاباته التى كان يرسلها....وخطه من اجمل الخطوط التى رايتها له الرحمه والمغفره

موضوع: رد: من السحاره الجمعة يناير 18, 2008 4:03 pm

استاذنك اخى سهام الدين لاقتحام سحارتك وعرض هذة الوثيقه

هى عبارة عن قسيمه زواج جدى تاج الدين وحبوبه سكينه عليهم رحمه الله

تاريخها كما مدون السبت 2شعبان 1342 هجريه \8 مارس 1924

الماذون :الطيب احمد سعد

الشهود حاج مراد الحاج بشير \ حاج بشير الماحى

بحضور محمد احمد مصباح

عليهم رحمه الله جميعا

خلفها موضح قيمه مقدم الصداق عبارة عن مواشى بالقيمه كما موضح

2 جنيه سدس ناقه بيضاء

6 جنيه ثلاثه نعجات كبار واثنين صغار واحد ذكر

2 جنيه ثلاثه غنمايات ماعز وواحدة صغير

الاجمالى عشرة جنيه مصرى

(معتصم لو فى شرح خليه على ابوك )

موضوع: من السحاره الجمعة يناير 18, 2008 4:08 pm

سحارتكم والله ماساهله وننتظر المزيد

وين صور رحله عادل جعفر الي كسلا وهو عريس يا سهام

موضوع: رد: من السحاره الجمعة يناير 18, 2008 8:45 pm

موضوع مميز جداًً

موضوع: رد: من السحاره السبت يناير 19, 2008 10:27 am

الاخوان الفكى ومعتصم
شكرا للمرور
الاخ باقر شكرا كتير للمساهمه وبجيك للتعليق على القسيمه